Стрептоцид 300 мг, №10, табл.
Тауарлардың көрінісі фотосуретте көрсетілгеннен өзгеше болуы мүмкін

Стрептоцид 300 мг, №10, табл.

Қолжетімділігі
Тауар қолда жоқ
Үлгі
4820007355677
Елі
Украина
Өндіруші
Лубныфарм ОАО
  • Сипаттама

Сипаттама

Дәрілік затты

медициналық қолдану жөніндегі нұсқаулық

СТРЕПТОЦИД

Саудалық атауы

Стрептоцид

Халықаралық патенттелмеген атауы

Сульфаниламид

Дәрілік түрі

Таблеткалар 300 мг

Құрамы

1 таблетканың құрамында

белсенді зат: стрептоцид (сульфаниламид) 300 мг

қосымша заттар: картоп крахмалы, тальк.

Сипаттамасы

Жоғарғы және төменгі беткейі тегіс, беткейлер жиегі қиғашталған, бір жағында бөлуге арналған сызығы бар, дұрыс тұтас, дөңгелек цилиндр түріндегі, ақ немесе ақ дерлік түсті таблеткалар.

Фармакотерапиялық тобы

Жүйелі қолдануға арналған микробқа қарсы препараттар. Жүйелі қолдануға арналған бактерияға қарсы препараттар.

Сульфаниламидтер және триметоприм. Қысқа мерзімді әсер ететін сульфаниламидтер. Сульфаниламид.

АТХ коды J01E B06.

Фармакологиялық қасиеттері

Фармакокинетикасы

Ішке қабылдағанда тез сіңеді – стрептоцидтің ең жоғары концентрациясы қанда 1-2 сағаттан соң байқалады (4 сағат шегінде жұлын сұйықтығында байқалады); қанда ең жоғары концентрациясының 50%-ға төмендеуі 8 сағат ішінде жүреді. Гематоэнцефалдықты (ГЭБ) қоса, гистогематикалық және плацентарлық бөгеттер арқылы өтеді. Тіндерге таралады, 4 сағаттан кейін жұлын-ми сұйықтығынан табылады. Бактерияға қарсы қасиеттерін жоғалту арқылы бауырда ацетилденеді. Препараттың шамамен 95% бүйрекпен шығарылады.

Фармакодинамикасы

Стрептоцид микроорганизмдерде «өсінді факторлар» деп аталатын – фолий, дегидрофолий қышқылдары, өз молекуласында парааминобензой қышқылы (ПАБҚ) болатын басқа қосылыстар түзілуін бұзады. ПАБҚ және Стрептоцид құрылымдарының жақындығы нәтижесінде сульфаниламид бәсекелі қышқыл антагонисі ретінде микроорганизмдер метаболизмдік тізбегіне қосылады және онда алмасу үдерісін бұзады, бұл бактериостатикалық әсеріне әкеледі. Стрептоцид – қысқа әсерлі сульфаниламид, стрептококктарға, менингококктарға, пневмококктарға, гонококктарға, ішек таяқшасына, токсоплазмоза және безгек қоздырғыштарына қатысты бактериостатикалық әсері бар. Анаэробты микроорганизмдерге әсер етпейді.

Қолданылуы

- тілме қабынуы

- баспа

- жарақат инфекциясы

Қолдану тәсілі және дозалары

Тамақтану кезінде немесе одан кейін 150-200 мл сумен ішіп, ішке қабылдау керек. Ересектер және 12 жасқа дейінгі балаларға бір реттік дозасы 600 мг - 1,2 г, тәуліктік дозасы – 3-6 г құрайды. Тәуліктік дозаны 5 қабылдауға бөледі. Ересектерге ең жоғары дозасы: бір реттік – 2 г, тәуліктік – 7 г.

6-дан 12 жасқа дейінгі балаларға бір реттік доза – 300-600 мг. Балалар үшін қабылдау жиілігі тәулігіне 4-6 рет.

Балалар үшін ең жоғары тәуліктік дозасы – 0,9-2,4 г.

Пациентке препаратты тағайындар алдында оған науқастың ауруын туғызған микрофлораның сезімталдығын анықтау керек. Емдеу ұзақтығын, аурудың ауырлығы мен ағымына, үдерістің оқшаулануына, емнің тиімділігіне байланысты дәрігер жекелей анықтайды.

Жағымсыз әсерлері

Жүйке жүйесі және лимфа жүйесі тарапынан:

лейкопения, агранулоцитоз, апластикалық анемия, тромбоцитопения, гипопротромбинемия, эозинофилия, глюкоза-6-фосфатдегидрогеназа тапшылығы кезіндегі гемолиздік анемия.

Жүрек-қантамыр жүйесі тарапынан: тахикардия, миокардит.

Жүйке жүйесі тарапынан: бас ауыру, неврологиялық реакциялар, асептикалық менингитті қоса; атаксия; елеусіз бас сүйекішілік гипотензия; құрысулар; бас айналу; ұйқышылдық/ұйқысыздық; шаршау сезімі; депрессия; шеткері немесе оптикалық нейропатия; көрудің бұзылуы; психоз; жабырқаулы жай-күй; парестезия.

Тыныс алу жүйесі тарапынан: өкпе инфильтраттары, фиброздаушы альвеолит.

Ас қорыту жолы тарапынан: шөлдеу, ауыздың құрғауы, диспепсиялық құбылыстар, жүрек айну, құсу, диарея, анорексия, панкреатит, жалған жарғақшалы колит.

Гепатобилиарлық жүйе тарапынан: бауыр ферменттері (АЛТ, АСТ, сілтілі фосфатаза) белсенділігінің жоғарылауы, холестаздық гепатит, гепатонекроз, гепатомегалия, сарғаю, холестаз.

Несеп шығару жүйесі тарапынан: несеп түсінің өзгеруі (қаныққан сары-қоңыр түс), несептің қышқылды реакцияларындағы кристаллурия,; болуы мүмкін нефроуытты реакциялар: интерстициальді нефрит, тубулярлы некроз, бүйрек жеткіліксіздігі, гематурия, ануриямен шок жағдайындағы бүйрек.

Тері және тері асты шелі тарапынан: тері гиперемиясы, тері бөртпесі (оның ішінде эритематозды-сквамозды, папулезді), қышыну, есекжем, аллергиялық дерматит, фотосенсибилизация, эксфолиативті дерматит, түйінді эритема, цианоз.

Аллергиялық реакциялар: уытты эпидермальді некролиз (Лайелл синдромы), Стивенс-Джонсон синдромы, жүйелік қызыл жегі, сарысу құю синдромы, анафилаксиялық реакциялар, Квинке ісінуі, мұрынның бітелуі.

Жалпы бұзылулар: дәрілік қызба, оң жақ қабырға астының және белдің ауыруы.

Басқалар: тыныс алудың қиындауы, түйінді периартериит, гипотиреоз, гипогликемия. Бірлі-жарым жағдайларда гипотиреоидизм дамуы мүмкін.

Қолдануға болмайтын жағдайлар

- Сульфаниламидтерге, сульфонға немесе препараттың басқа компоненттеріне жоғары сезімталдық;

- анамнезде сульфаниламидтерге айқын уытты-аллергиялық реакциялар болуы;

- сүйек кемігінде қан түзілудің бәсеңдеуі;

- декомпенсацияланған жүрек жеткіліксіздігі;

- қан түзілу жүйесінің аурулары;

- анемия;

- лейкопения;

- базедов ауруы;

- бүйрек және бауыр аурулары (нефроздар, нефриттер, бауыр жеткіліксіздігі, бүйректің ауыр жеткіліксіздігі, жедел гепатит);

- гипертиреоз;

- туа біткен глюкоза-6-фосфатдегидрогиназа тапшылығы;

- азотемия

- порфирия;

- 6 жасқа дейінгі балаларға;

- лактация және жүктілік кезеңінде әйелдерге.

Дәрілермен өзара әрекеттесуі

Бір мезгілде қолданғанда:

  • қабынуға қарсы стероидты емес препараттармен, сульфонилмочевина туындыларымен, тромбқа қарсы дәрілермен, К дәрумені антагонистерімен – осы препараттардың әсері күшейеді;
  • фолий қышқылымен, бактерицидті антибиотиктермен (оның ішінде пенициллиндермен, цефалоспориндермен) - сульфаниламидтер тиімділігі төмендейді;
  • бактерицидті антибиотиктермен, ішілетін контрацептивтермен – бұл препараттардың әсері төмендейді;
  • ПАСҚ және барбитураттармен – сульфаниламидтер белсенділігі күшейеді;
  • эритромицинмен, линкомицинмен, тетрациклинмен – бактерияға қарсы белсенділігі өзара күшейеді, әсер ету ауқымы кеңейеді;
  • рифампицинмен, стрептомицинмен, мономицинмен, канамицинмен, гентамицинмен, оксихинолин (нитроксолин) туындыларымен –препараттардың бактериялық әсері өзгермейді;
  • құрамында ПАБҚ (новокаин, анестезин, дикамин) эфирлері бар препараттармен – сульфаниламидтердің бактерияға қарсы белсенділігі жойылады.

– налидикс қышқылымен (невиграмон) – кейде антагонизм байқалады;

– хлорамфениколмен, нитрофурандармен – жиынтық әсері төмендейді;

Сульфаниламидтерді гексаметилентетраминмен (уротропинмен), диабетке қарсы препараттармен (сульфонилмочевина туындылары), дефининмен, неодикумаринмен және басқа жанама антикоагулянттармен бір мезгілде тағайындамайды.

Стрептоцид метотрексаттың әсерін және/немесе уыттылығын оны ақуыздармен байланысынан ығыстыру және/немесе оның метаболизмін бәсеңдету нәтижесінде күшейтуі мүмкін.

Сүйек кемігін бәсеңдететін басқа да препараттармен бір мезгілде қолданғанда гемолиз, гепатоуытты әсері, уытты әсерлердің даму қаупі болуы мүмкін.

Метенаминмен (уротропин) несептің қышқыл реакциясы кезінде кристаллурия дамуы қаупінің жоғарылауы салдарынан бір мезгілде қолдану ұсынылмайды.

Фенилбутазон (бутадион), салицилаттар және индометацин сульфаниламидтерді қан плазмасы ақуыздарымен байланыстан ығыстыруы мүмкін, осылайша олардың қандағы концентрациясын ұлғайтады. Парааминосалицил қышқылымен және барбитуралармен қолданғанда сульфаниламидтер белсенділігі күшейеді; левомицетинмен – агранулоцитоздың даму қаупі ұлғаяды; құрамында парааминобензой қышқылының эфирлері бар препараттармен (новокаин, анестезин, дикаин) сульфаниламидтің бактериялық белсенділігі жойылады.

Айрықша нұсқаулар

Препаратпен емдегенде бауыр функциясын және шеткері қан көрсеткіштерін, қанда глюкоза деңгейін жүйелі бақылап отыру қажет.

Препаратты ұзақ қолданғанда қан талдауын (биохимиялық және жалпы қан талдауы) мезгіл-мезгіл жасап отыру қажет. Препаратты жеткіліксіз дозада тағайындау немесе препарат қолдануды мезгілінен ерте тоқтату сульфаниламидтерге микроорганизмдер төзімділігінің жоғарылауына ықпал етуі мүмкін.

Сульфаниламидтерді А тобы бета-гемолиздік стрептококк туындатқан инфекцияны емдеу үшін қолданбаған жөн, өйткені олар оның эрадикациясына әкелмейді, демек, ревматизм және гломерулонефрит сияқты асқынудан сақтандыра алмайды.

Препаратты созылмалы жүрек жеткіліксіздігі, бауыр аурулары бар науқастарға, бүйрек функциясы бұзылуында сақтықпен тағайындау қажет. Стрептоцидті аллергиялық аурулардың ауыр түрі бар немесе бронх демікпесімен, қан жүйесі ауруларымен пациенттерге сақтықпен тағайындаған жөн. Жоғары сезімталдық реакциясы белгілері пайда болғанда препаратты тоқтату керек. Бүйрек жеткіліксіздігінде сульфаниламидтің және оның метаболиттерінің организмде жинақталуы мүмкін, бұл уытты әсерінің дамуына әкеледі.

Сульфаниламидтерді, оның ішінде стрептоцидті қант диабетімен науқастарға сақтықпен қолданған жөн, өйткені сульфаниламидтер қандағы қант деңгейіне әсер етуі мүмкін. Сульфаниламидтер жоғары дозаларының гипогликемиялық әсері бар.

Сульфаниламидтер бактерицидті емес, бактериостатикалық препараттар болып табылатындықтан, инфекцияның қайталануын және микроорганизмдердің төзімді түрлерінің дамуын болдырмау үшін толыққанды емдеу курсы қажет.

Химиялық құрылымы ұқсастығын ескере отырып, сульфаниламидтердіфуросемидке, тиазидті диуретиктерге, карбоангидраза тежегіштері мен сульфонилмочевина туындыларына жоғары сезімталдығы бар адамдарға қолдануға болмайды.

Кристаллурияның және уролитиаз дамуын болдырмас үшін пациенттерге сұйықтықты жеткілікті мөлшерде ішу қажет.

Егде жастағы пациенттерде тері тарапынан ауыр жағымсыз реакциялар дамуының жоғары қаупі, қан түзілудің бәсеңдеуі, тромбоцитопениялық пурпура (соңғысы – әсіресе тиазидті диуретиктермен үйлесімде) байқалады. Ауыр жағымсыз реакциялар туындаудың жоғары қаупіне байланысты препаратты 65 жастан асқан пациенттерге тағайындаудан тартынған дұрыс.

Сульфаниламидтер қолданғанда фотосенсибилизация дамуы мүмкіндігін ескере отырып, тікелей күн сәулесі мен жасанды ультракүлгін сәулеленудің әсер етуін болдырмау керек.

Емдеу кезінде дозалау режимін ұстанып, ұсынылған дозаны 24 сағат аралықпен қолдану қажет, препарат қабылдауды өткізіп алуға болмайды. Дозаны өткізіп алған жағдайда келесі дозаны екі еселемеу керек.

Егер ауру белгілері жоғала бастамаса немесе керісінше денсаулық жағдайы нашарласа, немесе қолайсыз құбылыстары туындаса, препарат қолдануды тоқтатып, препаратты одан әрі қолдану мүмкіндігі туралы кеңес алу үшін дәрігерге қаралу керек.

Балалар

6 жасқа дейінгі балаларға қолданбайды.

Жүктілік және емшек емізу кезеңінде қолдану

Жүктілік және бала емізу кезеңінде препаратты қолдануға болмайды.

Препаратпен емдеу қажет болған жағдайда бала емізуді тоқтатқан жөн.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Препаратқа жеке реакциялар анықталғанға дейін автокөлікті басқарудан немесе басқа механизмдермен жұмыс істеуден тартына тұрған жөн, өйткені сульфаниламидтермен емдеу кезінде бас айналу, құрысулар, атаксия, ұйқышылдық, депрессия, психоз сияқты жүйке жүйесі тарапынан жағымсыз реакциялар болуы мүмкін.

Артық дозалануы

Жағымсыз әсерлері байқалуының күшеюі мүмкін.

Артық дозаланғанда анорексия (тәбеттің болмауы), жүрек айнуы, құсу, шаншу тәрізді ауырулар, бас ауыруы, ұйқышылдық, бас айналу, естен тану туындауы мүмкін. Ұзақ қолданған кезде қызба, гематурия, кристаллурия, цианоз, тахикардия, парестезия, диарея, холестаз, ануриясы бар бүйрек жеткіліксіздігі, уытты гепатит, лейкопения, агранулоцитоз болуы мүмкін.

Емі. Артық дозалану жағдайында дәрігерге қаралу ұсынылады. Емі симптоматикалық. Медициналық жәрдем көрсеткенге дейін асқазанды 2 % натрий гидрокарбонаты ерітіндісімен шаю және белсендірілген көмір немесе басқа энтеросорбенттер суспензиясын қабылдау керек. Көп мөлшерде сұйықтық қабылдау, қарқынды диурез, гемодиализ көрсетіледі.

Шығарылу түрі және қаптамасы

10 таблеткадан поливинилхлоридті үлбірден және алюминий фольгадан жасалған пішінді ұяшықты қаптамаға салынған.

Пішінді ұяшықты қаптамалар медициналық қолдану жөніндегі мемлекеттік және орыс тіліндегі нұсқаулықпен бірге макулатуралық хром-эрзац немесе қораптық картоннан жасалған қораптарға немесе гофрланған картоннан жасалған жәшіктерге салынады.

Нұсқаулықтар саны топтық қаптамаға қаптамалар саны бойынша салынады.

Сақтау шарттары

Түпнұсқалық қаптамасында, 25 °С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

5 жыл.

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші/Қаптаушы

«Лубныфарм» АҚ,

Украина, 37500, Полтава обл., Лубны қ., Барвинков к-сі, 16.

Тіркеу куәлігінің иесі

«Лубныфарм» АҚ,

Украина, 37500, Полтава обл., Лубны қ., Барвинков к-сі, 16.

Қазақстан Республикасы аумағында тұтынушылардан дәрілік заттар сапасына қатысты шағымдар (ұсыныстар) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта)

«Pharmaline» ЖШС,

050016, ҚР, Алматы қ., Шамиев к-сі, 11 үй,

Тел.+7 (727) 3384814

электронды пошта: info@pharmaline.kz